Su sadru est una lìngua neolatina, bollit nai chi fait pa(r)ti de sa truma de is lìnguas chi ndi benint de su latinu, chi funt s’arromenu, s’italianu, su friulanu, su ladinu, su frantzesu, s’ocitanu, su cadelanu, su spanniolu, su galitzianu e su portughesu.

Su sadru tenit una strutura sua particulari chi dda fait arreconosci intru de is lìnguas neolatinas e diferenti meda de sa strutura italiana, duncas, no est unu “dialetu” de s’italianu, comenti calincunu sighit a nai.

Intru de is cosas particularis, agataus fueddus, chi funt abarraus giai giai in sadru sceti, comenti a domu, de su latinu domus, in prus est una de is lìnguas neolatinas chi prus de totu is atras at apoderau fueddus prus antigus de su latinu, comenti a cùcuru (collina) e medas atrus.