TORRAUS

A

CUMENTZAI!

Tòrrat a cumentzai su cursu de sardu in Biddesatu, chi at'essi dònnia martis de is 6 a is 8.

Po is chi ant fatu giai su cursu in su 2007 - 2008, eus a biri de innui torrai a pigai. Ocannu, in prus de su chi eus giai fatu, eus a chstionai fintz''e de literadura sarda e de stòria de Sardìnnia.

Su cursu cumèntzat martis su 20 de custu mesi e ddu feus sempri in su Comunu, in s'aposentu de su Consillu Comunali. Po si scriri podeis andai a s'Ufìtziu de sa Lìngua Sarda o benei deretus sa primu di' de letzioni.

Su cursu est in campidanesu e su maistu est Amos Cardia. No si pàgat nudda.

S’ Ufìtziu de sa Lìngua Sarda de su Comunu de Biddesatu at torrau a oberri custu annu puru. Dònnia martis e mrècuris de is 9:30 a is 11:30 de a mengianu in sa bibrioteca noa (Caserma bècia). Nci trabàllat Simona Axana e NCI podeis andai po si fai agiudai po totu su chi spètat sa lìngua e sa curtura sarda. E puru po cosas in italianu chi perou estis a bolli scriri in sardu. No si pàgat nudda.
Custus duus traballus, Ufìtziu e Cursu, funt de su progetu Biddesartu Bilìngua 2, po fai imperai su sardu in Biddesatu de manera moderna e po dònnia cosa. Totu su traballu ddu pàgat sa lei de su Stadu 482/99.

Su Comunu de Biddesatu giai de diora est traballendi beni po sa lìngua e po sa curtura sarda e tra pagu eus a presentai, donendudeddu a donu a totu is famìlias, su ditzionariu de su sardu de Biddesatu, Fueddàriu biddesartesu, chi po sa di’ s’eus a avisai a totus.

Po ndi sciri de prus,

tel. 349.342.00.05 - Questo indirizzo e-mail è protetto dallo spam bot, abilitare Javascript per vederlo (Amos Cardia – Cursu de Sardu)

Questo indirizzo e-mail è protetto dallo spam bot, abilitare Javascript per vederlo (Simona Axana – Ofìtziu de sa Lìngua Sarda)

www.biddesartubilingua.it