Fait a sighiri unu itineràriu in su Monti Genis e in su Monti Arrùbiu. Chini arribat de sa bia de Casteddu depit sighiri sa bia nùmuru 27, dda depit lassai pagu innantis de arribai a Biddesatu po sighiri sa bia de a manca ca po(r)tat in su Monti Genis. Un’atra bia acàpiat a su Monti Arrùbiu.

Candu acabat sa bia e su padenti agataus medas camineras chi po(r)tant a una mata seculari de ìlixi.

De su pitzu de su Monti Genis fait a biri su logu de su Genn’‘e ‘entu finsas a su Monti de is Seti Fradis; de innoi fait a biri una perra de sa Sardìnnia orientali.

In pitzu de su Monti nc’est unu tallu de murvonis chi fait a ddus biri a chitzi. Nci funt puru sirbonis, margianis e conillus. Fait a biri is arruinas archiològicas de Sa Domu De Sa Nii, de sa Conca De Sa Tupa e de sa mitza de Tzipuledda.

In sa Domu De Sa Nii nci funt logus ca furiant imperaus po allogai sa nii ca serbiant candu arribàt su callenti po allogai sa cosa de papai in friscu.

A màchina ‘e monti fait a arribai a Burcei sighendi su passu de Genn’‘e Arasili.

In su padenti de Monti Arrùbiu nci funt tallus de cerbus sardus in Cesàrgius. Fait a biri sa Necròpoli de Cea Romana e fai passilladas a pei o a bicicreta ‘e monti.

Atras passilladas fait a ddas fai in is ceas de su Flumendosa, a S’àcua Callenti, a Domueu, a Cannàchili e in is atrus montis de Biddesatu: Monte Lora, Casàrgius e S’Arbanedda.